عبرت نامه - پندیات-
عبرت نامه - پندیات
✍ گلچین نغمه های غم✍
مرحوم منزوی اردبیلی
ایهاالناس گلین گردش دوورانه باخین
قدرت مطلق خالق سبحانه باخین
اویمایین فانی اولان کبکبیه دَبدبیه
چشم عبرتله گلین عالم امکانه باخین
زرق و برقیکی گورورسوز بو فنا دهریده سیز
یئل اسن وقته گئدین شمع شبستانه باخین
بیر سینیق کورپویه بنزر سویون اوستونده جهان
اوردا منزل ائلمز عاقل و فرزانه باخین
باخمایین هرزه آغیزلاردا اولان لغلغیه
انبیاء صحبتینه، پند حکیمانه باخین
قویمایین خوار اویلا قرآنوزی انجیل کیمین
توز باسیب گرچه سیلین، بیرده بو قرآنه باخین
مسلمینین سایی میلیاردی گئچیب دنیاده
ولی بو کثرتلن نسبت نقصانه باخین
هامی ادیان آراسی بو دینی الله بَیَنیب
بیر گلین سیزده پسندیدۀ یزدانه باخین
دئمیین ملت اسلام عقب افتاده دیلر
ضعف اسلام دَگیل، ضعف مسلمانه باخین
اجنبی تفرقهسی یئتمیش ایکی فرقه ائدیب
اولدیلار بیر بیرینه گور نئجه بیگانه باخین
قلب اسلامیدی مکه اوتوروب آمریکا
قل اعوذ اوخویون قلبده شیطانه باخین
بو علی دشمنی باخ گور نئجه بیغیرتیمیش
اَگلشیب مصدر دیوانیده دیوانه باخین
ای مسلمانلار آلین اسلحه امداده گلین
شوروی قصد تجاوز ائدهن افغانه باخین
شیعهلیک جوهری هر یئرده کی وار غیرت وار
دورد ابرقدرتی رد ائیلهدی لبنانه باخین
انبیاء مکتبی انسانه سعادت یارادار
خبث ابلیسی بیلین، حکمت لقمانه باخین
آز بو بش گونلیک اولان نعمتی دورد اللی دوتون
سعی ائدین عالم اولون، عالم عرفانه باخین
هر شب جمعه گئدین ساحت قبریستانه
توپراق آلتیندا یاتان سائل و سلطانه باخین
عرض و طولینده بیر آز فکر ائیلیین قبرلرین
جُرم حبس ابده،تنگی زندانه باخین
ناز بالیشده یاتان گونلرینی فکر ائلیین
داشا پَر قو یئرینه باش قویان انسانه باخین
بو همان شخصیدی قویمازدی قونا توز باشینا
توپراق آلتیندا یاتیب گور نه ذلیلانه باخین
بو همان شخصیدی توپراقه ده قویمازدی قدم
باش قویوب ایندی او توپراقه فقیرانه باخین
نه سالیر یادینه اولادی نه ده اقوامی
هی سیزیلدیر بالالاریم، من نالانه باخین
من گوز اوستونده سیزی بسله میشم دنیاده
قاباقیزدا آچیلان سفرۀ الوانه باخین
سیزون اوستوزده یالان قالمادی من خلقه دئدیم
سیزلره خاطر الیمدن گئدن ایمانه باخین
یالان آند ایچمیشم ازبس که رسول اللهه
اودا کی دشمن اولوبدور من نادانه باخین
آل وئریمده سپر ائتمیشدیم ابوالفضل آدینی
اودا لطفین کسیب از بس، بو پریشانه باخین
سیزه خاطر نه ترازونی دوزهتتیم نه داشی
کم ساتیب آرتیق آلان سفله مسلمانه باخین
حضرت علی اصغر علیه السلام
مرحوم صافی تبریزی
سن سیز علی روز و شب ذکریم اولوب وای اوغول
من سنه لای لای دیوم یا دیوم ای وای اوغول
اوچ گیجه گوندوز علی هر نه دیدیم یاتمادون
باشدا کی سو فکرینی باشدان اوغول آتمادون
ویرودیلر سو سنه مقصدیوه چاتمادون
من سنه لای لای دیوم یا دیوم ای وای اوغول
دل یوخیدی حالیوی ایلیه سن یاخشی فاش
یاندون اوغول آغلادون سینهمی ایتدون خراش
منده ئولیدیم سنی گورممیش اولده کاش
من سنه لای لای دیوم یا دیوم ای وای اوغول
چون سنون اسکاتوی حرمله ایجاب ایدوب
هم سنی دلدن سالوب هم منی بی تاب ایدوب
اوز بوغازوندان آخان قانیله سیراب ایدوب
من سنه لای لای دیوم یا دیوم ای وای اوغول
دوتموسان الفت علی گوردیله پستانیله
آچدیلا سوددن سنی زهریلی پیکانیله
قویدولا یاخشی منی ناله و افغانیله
من سنه لای لای دیوم یا دیوم ای وای اوغول
گیتمز علی سینه دن دیرناقیوون یرلری
حشره گلنده آنون تک بو یری گوستری
فاطمه نی یاندیری آغلادی پیغمبری
من سنه لای لای دیوم یا دیوم ای وای اوغول
بسکه سکینه یانور سن کیمی قارداشینه
خیردا اوشاقلار باخور آغلوری گوز یاشینه
هی دولانولار اوغول بوش بشگون باشینه
من سنه لای لای دیوم یا دیوم ای وای اوغول
گه سنی بوش امجگه سالدیم اوغول آغلادیم
گوردوم علی دوزموسن اللریوی باغلادیم
اکبر آناسی کیمی منده جگر داغلادیم
من سنه لای لای دیوم یا دیوم ای وای اوغول
خیمه لری سو دیوب هر نه دولاندیم علی
اولمادی بیر کیمسه دن چاره دایاندیم علی
گاه اوز احوالیمه گه سنه یاندیم علی
من سنه لای لای دیوم یا دیوم ای وای اوغول
حالیمی آنلار گورن دیده گریانیمی
سینمه بیر اود دوشوب یاندوریری جانیمی
گرچه دیوب اوخشارام سن قوزی قربانیمی
من سنه لای لای دیوم یا دیوم ای وای اوغول
گاه بو بوش سینه دن عطرون آلیب آغلارام
گاه ایاق دوتماقون یاده سالوب آغلارام
اللری قوینوندا من گرچه قالوب آغلارام
من سنه لای لای دیوم یا دیوم ای وای اوغول
هر آنا اوز اوغلونی اوخشیوب آغلار یانار
هر باجی قارداشینه گرچه سیزیلدار یانار
لیک رباب ایندیدن هر نه قدر وار یانار
من سنه لای لای دیوم یا دیوم ای وای اوغول
قالدی اوغول اودلانان قلبده نیسگیلریم
هانسی الیله منیم حل اولی مشکل لریم
داشه دیسم بولمیشم یاندیری بو دللریم
من سنه لای لای دیوم یا دیوم ای وای اوغول
نه یوزیله یثربه ای علی بیرده گیدیم
گورسم اگر سود امر بیر بالا بس من نیلئیم
هانسی زمانون سنون یاده سالوب ذکر ایدیم
من سنه لای لای دیوم یا دیوم ای وای اوغول
من نجه سن سیز باخوم بیرده گوله گلشنه
آغلامیوم گلمیوم صبح و مسا شیونه
یاخشی ملر قالمیشام وای منه ای وای منه
من سنه لای لای دیوم یا دیوم ای وای اوغول
نیلر او ساعت آنان گر دوشه بیر گون اله
سو ایچه سیراب اولا سینه سینه سود گله
ای سبب هجرت صبر دل و حوصله
من سنه لای لای دیوم یا دیوم ای وای اوغول
آغلامورام من سنه آج و سوسوز اولموسن
سن اوغول اوخلانماقین لذتینه گولموسن
قان آتاوا آغلورام سرین اوزون بولموسن
من سنه لای لای دیوم یا دیوم ای وای اوغول
آخشام اولی وقت اولی سود امره سود امر
سود امرین شوقونا سینه لره سود گلر
هانسی آنا صبر ایدور اوخلانا گر سود امر
من سنه لای لای دیوم یا دیوم ای وای اوغول
صافی اگر ایسته سن فاطمه دلشاد اولا
اصغر آناسی گرک ذکر اولونا یاد اولا
بسدی اولونجه بو سوز موجب فریاد اولا
من سنه لای لای دیوم یا دیوم ای وای اوغول
✍ گلچین نغمه های غم✍
استمداد حضرت ابوالفضل ع
مرحوم استاد عابد خیابانی
ای فیضیوه محتاج هامی عالم و آدم
اقلیم محبّت سنه تفویض و مسلّم
تشریفیوه اولموش هامی اسباب فراهم
فرش ایلمیشم اطلس گلرنگ، ترابه
تعجیلیله قوی پای فلک سیری رکابه
ماذون ایلدون اونداکی سو ایتماقا تحصیل
بو خدمت ابوالفضله اولوب مایه ی تجلیل
اجراسینه ایتدی اودی چوخ شوقیله تعجیل
شاید که بو خدمتده اولا یار سعادت
اجراسی ابوالفضله اولا مایه ی عزّت
بولدوم که مماشاته دی شه خاطری مایل
اولدوم سپهه رسم رساتیله مقابل
افسوس که درک ایلمدی فرقه ی باطل
دل آچدیلار اقوام اباطیله سراسر
گوردوم که اولار جنگیله مقصود میسّر
پوزدوم ایله بیر قدرتیله نظم سپاهی
دل چاتدی تمنّاسینه بو یولدا کماهی
موّاج گورنده سویی چون سینه ی ماهی
دل شوره گلوب چخدی اورک سوزشی یاددان
هر سوزی آپاردی او سویون لرزشی یاددان
فکر ایتدیم ایکی سس اوجالور عرشه بو یرده
بیر ناله ی اصغر که گلوب نی کیمی درده
بیرده سویون آهنگیدی که پرده به پرده
امواج فضانی بورویوب زیر و یمیندن
گویا که ایدور ناله بو قومین ستمیندن
ترکیب اولالی بو ایکی سس اوج فلکده
ناله ایدور ایجاد دل ماه و سمکده
نفرینه مبدّل اولوری ذکر مَلَکده
لعن ایلوری شام اهلینه سکّان سماوات
بو ظلم نظیرین گوره دنیا گوزی هیهات
بیر یاندا آخور شوق لب اصغریلن آب
بیر یاندا عطش خاطر اصغردن آلوب تاب
بیر یاندا یانار چوللری سو ایلوری سیراب
بیر یاندا یانان دللر اولوب قان سوسوزوندان
اولاد پیمبر ویروری جان سوسوزوندان
بو فکرلر اود سالدی ایله قلب نوانه
تار اولدی جهان دیدمه، دویدوم داخی جانه
طوفان کیمی ووردوم اوزیمی آب روانه
تسخیر ایلدیم سرعتیله آب فراتی
چون خضر گتوردوم اله اکسیر حیاتی
آگهسن اوزون شدّت سوز عطشیمدن
نفسیله سو اوستونده اولان کشمکشیمدن
نفس اولدی زبون همّت بی غلّ و غشیمدن
امّا سویا ال وورماقیمی عفو ایله شاها
عفو ایله بو تقصیری کسیلمیش اله شاها
آغلار گوزیله آینه ی آب رواندا
گوردوم عطش آثاری لب جان جهاندا
یاندی اورگیم نائره ی سوز نهاندا
سولموش گوره لی نوگلینی باغ حیاتین
گوزیاشیم آخوب، موجینی آرتوردی فراتین
ایتدیم گوزیمون جامی کیمی مشکی لبالب
چخدیم سودان اودلی اورگیمده شرر تب
دل نغمه سی: حفظ ایله اوزون بو سویی یارب
مخیمده عطشدن قورویان لبلره خاطر
گل تک سارالان رنگ علی اصغره خاطر
بیر جنگ و ستیز اولدی که تار اولدی فلک لر
ردّ ایتدی تماشایه حجاباتی مَلَک لر
ماهی کیمی قان لجّه سینه باتدی اورک لر
ظلماتیده اُرتولدی رخ روشن آفاق
یردن اوجالان گرد، آلوب شمسیدن اشراق
هر لحظه ده شدّت ایلدی موج تنازع
دورمده جفا تیغلری تاپدی تقاطع
افراد ایلدی بیر بیره قتلیمده تتابع
یاغدوردی اوخی اوستومه بو اهل تفاخر
باران بلا ایلوری گویا که تقاطر
شاهین کیمی بال آچماقا من اوج وفاده
دریا قوشی تک باتدیم او طوفان بلاده
شهپر کسیلوب، حادث اولوب ضعف قواده
بیر کشتی طوفان زده تک سیندیم اورکدن
ال گیتدی، هامی قدرتیمی آلدی بیلکدن
ال خدمتینی قورتاروب آیریلدی بدندن
بیر شاخه ی تردور دیه سن سیندی سمندن
همراه آپارا ایستمدی روحیده تندن
گوردی گینه وار کشمکش و جنگه ضرورت
سالمدی سو مشکی اونا لازمدی حراست
بو امری محوّل ایلدی دست یساره
ال ویردی صول ال قدرتیله رشته ی کاره
تیغیله عدو کشتینه یاغدوردی شراره
چوخ کیمسه لری تک الیله سالدی نفسدن
تک ال الی کوتاهیدی گرچه هامی سسدن
بیر بالیله شاهین پر آچوب اوج هماده
انصاف ولیک اولمادی صیّاد قضاده
بیر تیغ ستم اوینادی ناگاه فضاده
ضربیندن اولوبدور صول الیم صاق اله لاحق
یول اوسته دی گوزلور یولیوی لاحق و سابق
دوشدی ایکی ال، شانه ی دل اولدی سبکبار
قالموبدی ولی منده داخی قدرت پیکار
مصروف ایلدیم همّتی بو همّیده ناچار
سو مشکی مگر حفظ اولا آسیب ستمدن
عبّاس خجل اولمیا اطفال حرمدن
کسگین قلجیم ال کسیلوب دوشدی کسردن
شمشاد کیمی بوش قالوب ال شاخی ثمردن
افسوس علاج اولمادی حسرتلی نظردن
الدن الی بوش بیر اله گوز سوزیله باخدی
یوخ چاره گوروب، اشک روان دامینه آخدی
سوزیله دولان سینه نی دل ایتدی وقایه
یر ویردی گوز اوستونده گلن تیر جفایه
افسوس سپر اولمادی پیکان جفایه
بیر اوخ تاپوب ال مشکه، شرر جانیمه سالدی
قلبیمده اولان طاقت و آرامیمی آلدی
حضرت ابوالفضل اعباس علیه السلام
مرحوم منزوی اردبیلی
او قانلی گوزلریوی آچموسان نیه قارداش
بلالی قارداشیوا ایتموسن ملالیوی فاش
عیان ایله منه دردون بولوم من خسته
عقابیدن یره دوشدون اگر یوزی اوسته
دله گلوب اوزون آگاه ایله بو سرّی منی
گوروم کیم آرخاوون اوستونده دوندروبدی سنی
بدنون آرخاسی اوسته و یا ترابه دوشوب
او وقته علّتی یوخ توپراقه یوزون بلشوب
یقین اولور منه بیر آندا رم یینده سمند
یره دوشنده ایاقون اولوب رکابیده بند
یقین بو ماه جمالون که توپراقا بورونوب
نچه قدم قوری یرده او گل یوزون سورونوب
هامی بولور بونی سن معدن شجاعت سن
گوز آچموسان یوزیمه اولمیا خجالت سن
یقین سوسوزلارین حالین گلنده گورموشدون
منیم رقیّه بالاما سو قولی ویرمیشدون
جنازن اوسته تک گلمیشم قانا بویانام
اوتانما گوزلرون آچ گلمیوب رقیّه بالام
شجاعت حضرت ابالفضل العباس (علیه السلام)
سیدهادی موسوی نوشاد
یازدی قلم بیرده سوزون،احساسه خاطیر
نشرایلدی سوزبیردل حساسه خاطیر
گلدی بیانه سوزلرون،بویازماقیندان
شرمه دوشوبدی دشمن خناسه خاطیر
هم شعری عنوان ایلوری شاه بلایه
هم ده یازیرشعرون اوپاره یاسه خاطیر
شرم ایلوری تایازمیامطلب سوزوندن
امادیور شعرون امیرالناسه خاطیر
آری اوتاما یازقلم هردم سوزوندن
ختم ایله گوهرمدحینی،الماسه خاطیر
یعنی شجاعتدن دنن،غملر پوزولسون
عنوان ایله سن شعریوی عباسه خاطیر
یاز ای قلم مدح وشجاعتدن مکرر
عنوان ایله شخصیت عباس حیدر
بیرعبدناب اولدی،علی اوغلی ابالفضل
سقاحساب اولدی،علی اوغلی ابالفضل
هرکس سؤال ایدی،که کیمدی چوخ وفالی
هردم خطاب اولدی، علی اوغلی ابالفضل
آری علمدار اولماقا،دشته بلاده
دوز انتخاب اولدی،علی اوغلی ابالفضل
اوزباشینا،یول گتمه دی،آلدی ایجازه
جنگه جواب اولدی،علی اووغلی ابالفضل
سوتزگتیر،بوخیرداجا قیزلاره خاطیر
درفکرآب اولدی علی اوغلی ابالفضل
دوشمنلره،یوز ویرمدی،میداندا بیرباش
یوم العذاب اولدی،علی اوغلی ابالفضل
میداندا چاتدی سسلدی آی قوم کفار
خصمه سراب اولدی،علی اوغلی ابالفضل
هرکس که قورخور،قاچسی بیر یرده دایانسین
پادر رکاب اولدی،علی اوغلی ابالفضل
دوشدو یولا،نیزه الینده،اشجع الناس
حیدر کیمین جنگ ایلدی میداندا،عباس
سسلندی ای قوم خطاکاروگنه کار
ای قوم بدکردار و ای قوم ستمکار
من حامی دین حسین بن علیم
ساتمام یزیده دینیمی،اولمام هوادار
ایکی جهاندا،اولمیشام زهرایه نوکر
ام البنین تک اولموشام،زهرایه غمخوار
عباس علی اوغلی ابالفضلم بیلون سیز
دینی حمایت ایلرم،اولمام سیزه یار
آری ابالفضلم, علمداروسپهدار
طوفان کیمین من ایلرم میداندا،پیکار
رخصت اگر ویرسه آقام،جنگ ایلرم من
بیر یرده ئولدورم تمامه قوم اشرار
وئرمم اجازه،بیرنفراولسا نفس کش
بیردم باخانماز،خیمیه،بوقوم بدکار
گر دوشسه ده، قولاربدندن،یوخ هراسیم
جنگ ایلرم،تا اوزمانی که نفس وار
یوزمین دنه،اولسا امان نامه چوحاضیر
وئرمم حوسینین بیرتوکون دونیایه خاطیر
✍ گلچین نغمه های غم ✍
حضرت علی اصغر علیه السلام
مرحوم منزوی اردبیلی
چوللرده آهولر ملر ای صود امر آهو سنه
دریا قوتارمازدی بیر آز وئرسیدی دشمن سو سنه
بیر سو که وحشی لر ایچه اطفاله یوخ لازم دگل
هر جرعه سی بیر طفل اوچون کافیدی چوخ لازم دگل
سو وئرمورم بیر کلمه دی اوچ شعبه اوخ لازم دگل
سو ایستدون اوخ یوخ دئدی ای صود امر آهو سنه
بلبل جهاندا رسمیدور گلبرگینی خوار ایستمز
عالم اگر گلزار اولا گلشنده بیر خار ایستمز
بیر صود امر ئولدورمگه بیر مرد خونخوار ایستمز
غیظ تمامیله آتوب اوخ قوّه لی بازو سنه
ای سو سراقینده گزن سو آختارشمورسان نیه
آغزوندا چوخ سوز وار سنون بولمم دانشمورسان نیه
دنیا سویوندان کوسموسن منله دانشمورسان نیه
منده یولوب بذل ایلرم تل تل آغارمیش مو سنه
افسوس اوغول دیل آچمادون تا رحمه گلسون حرمله
یومدون دوداقون دینمدون سالدون ربابی مشکله
قان ورطه سینده ال ایاق چالدون امید ساحله
جسمون اولوب فُلک نجات اوز اللرون پارو سنه
عمّون اجازه وئرسه گر قالّام بو چولده گیتمرم
روز و شب آختارّام سنی تاپسام اگرترک ائتمرم
زلفومله یارَن باغلارام چوخ سیخمارام اینجیتمرم
گوز کاسه سینده بسلرم خون دلی دارو سنه
من «منزوی» خلقون سوزون چوخ ایشده حجّت بولمرم
بیر سن دئسن نوکر منه شاهلیقدا قیمت بولمرم
بو نطقی سن وئردون منه منکه فصاحت بولمرم
چوللرده آهو لر ملر ای صود امر آهو سنه
وداع حضرت اباعبدالله الحسین علیه السلام
سبک زنجیر زنی سه ضرب
مرحوم شهاب تبریزی
اولوبسان قتله آماده حسین بس نیلسون زینب
سن ئولسن گر بو صحراده حسین بس نیلسون زینب
اَلَست عهدین دگل ممکن بو گون بو چولده سیندیرماخ
بلایه امتحان وقتی گرگ قلبی دایاندیرماخ
ولیکن خوردا قیزلاری اولور مشکل اوساندیرماخ
بالالار گلسه فریاده حسین بس نیلسون زینب
وداع آخِر اعلانی ویرنده سن منه قارداش
حرملر باش آچوب یکسر گلوبله شیونه قارداش
آتوب اوز فکریمی منده بو گون یانّام سنه قارداش
دایانسون گلمه سن داده حسین بس نیلسون زینب
ملول اولما گوزوم یاشی حسین آردونجا گر آخسا
نه من یانّام بو احواله، یانار بیگانه لر باخسا
یِری وار عالمی آهیم شراری یاندیروب یاخسا
شراره دوشسه ایجاده، حسین بس نیلسون زینب
نجه قان آغلاماز سنسیز حسین خونین جگر زینب
سنون تک قارداشی اُلسه دوام ایلر مگر زینب
عزاده ایتمَسون جاری جگر قانین مگر زینب
بو صحرای غم افزاده حسین بس نیلسون زینب
آدیم زینب اولان گوندن منیم بختیم قرا اولدی
آنام زهرا کیمی عالم منه ماتم سرا اولدی
جهاندا هانسی بیر عورت منیم تک مبتلا اولدی
بو قدری ظلم و بیداده حسین بس نیلسون زینب
فلک سندن صورا بوللم توکر بو باشیمه کُللر
اجازه ویر بوغازوندن اُپوم باری من مُضطر
آنام ایلوب وصیّت چون قویار شمر لعین خنجر
دوشَن ساعت او سوز یاره حسین بس نیلسون زینب
منه معلومیدی قارداش بُلوردوم بو قضایانی
اودور گُلموب ازل گوندن یوزوم دنیاده بیر آنی
فراقون گرچه مشکلدور دایانّام گیت حسین جانی
یِتر هر غم بو ناشاده حسین بس نیلسون زینب
مرامون گرچه بو چولده سنون قارداش شهادتدور
منه امّا بو هجرانون قیامتدن علامتدور
گورنده نیزده باشون منه مطلق قیامتدور
قوپار حشریم بو مَاواده حسین بس نیلسون زینب
منی امر ایلسن صبره دایانّام ای شه عالم
گلوگیر ایلیوب غصّه اوجالماز بیرده بیر نالم
قیزون ایستَر سنی مندن اودور پژمرده احوالم
گیدنده طاقتی باده حسین بس نیلسون زینب
نه چاره ایلیوم قویمور محبّت آیریلام سندن
ملول اولما یانور قلبیم باغشلا، اینجیمه مندن
دایان بیر لحظه منظوریم بودور بو داد و شیوندن
سن ئولسن گر بو صحراده حسین بس نیلسون زینب
او گونکه باشوه دوشدی سنون کرب و بلا شوقی
سالوبدور بوینونا زینب او ساعتدن بلا طوقی
ویرنمز امتحان هر کس باشندا اولماسا شوقی
ئولونجه گلمه سن داده، حسین بس نیلسون زینب
✍ گلچین نغمه های غم ✍*
:
حضرت زهرا سلام الله علیها
احد عدلجو غازانی ( تبریزی )
زینب ای فاطمه نون بنزری سیماده قیزیم
منه حسرتله باخوب گَلمه بیله داده قیزیم
توکمه گوزیاشیوی قربان او گوزل گوزلریوه
اوتی باهم دانیشاق مشتریم سوزلریوه
حیف اولا قارخمور الیم شانه وورام تِللریوه
قنفذون قمچیسی ایلوب منی افتاده قیزیم
گَۀ قیزیم آغلاما سنسن آناوین نائبه سی
من اُلندن صورا سنسن بو ایوین فاطمه سی
سن بو گوندن اولاجاقسان ننه سیزلر ننه سی
اوزیوی ایت آنا اولماقلیقا آماده قیزیم
سن منیم جانشینیم نام و نشانیم بالاسان
آناوین ایمدی گرک اُلسه یرین سن آلاسان
ایش بیله دوشدی قیزیم سنده آناسیز قالاسان
آغلاما گَلمه بیله ناله و فریاده قیزیم
بیرده مندن صورا بو ایو دونی بین الحزنه
ویر تسلّی بو چتین وقته شه ممتحنه
آنالیق ایله اوزون مظلوم حسین و حسنه
من اَُلندن صورا قویما گَله لر داده قیزیم
آناوین ساغر آمالی قیزیم دولمیه جاق
هیچ گلستاندا منیم تک گُل آچوب سولمیه جاق
بُلورم مجلس ترحیمه گَلن اولمیه جاق
سن اوزون اوخشا منه بیت غم افزاده قیزیم
قویما مندن صورا قلبین آتاوین غملر آلا
آخشام اولجاق چراغین یاندور ایوینی نازلی بالا
یاری الدن گیدنی قویما قرانلوقدا قالا
تسلیت ویر آتاوا بو غم عُظماده قیزیم
هله صاقدور بو آنان ایمدیدن آز ایله ملال
بوینی چیگنینده گَزوب آز منیم آرامیمی آل
آغلاما گَل بالاجا اللریوی بوینوما سال
خرمن صبریوی ویرمه بو قدر باده قیزیم
منه هله اُلمه میشم توکمه بیله گوزیاشیوی
سیل گوزون، آغلیوب آغلاتما حسین قارداشیوی
گَل قیزیم قوی یارالی سینمین اوسته باشیوی
اُلمه میش یات بو گئجه سینه ی زهراده قیزیم
منیم اُلماقلیقیما ایلمه چوخ سوز و گداز
آناوین منشی تقدیر یازوب عمرینی آز
بیله فکر ایله آنان چوخدان اُلوب ای گُل ناز
یورما چوخ اوز اوزیوی گَلمه بیله داده قیزیم
یوخدی بو فانی جهاندا اُلومه چاره یازان
یارانان اُلمه لیدی آغلاما ای جانیمه جان
ایمدیده اُلمه سه بیر گون اُله جاقدور بو آنان
چاتمیوب هیچ کیم اوز آمالینه دنیاده قیزیم
من بو ایوده غم الیندن بالا دویدوم جانه
دفتر عمریمی ویردیم غمیله پایانه
نه حنا زلفیمه قویدوم نه ده ووردیم شانه
شانه وورسان تِلیوه سال منیده یاده قیزیم
سنه بو ایوده قیزیم سینه گُلی باغلامادیم
طوی گونونده آنالار تک بوییوی اوخشامادیم
نسگل اولدی سنی من بخت ایوینه یولّامادیم
حسرتیم قالدی اُلونجه بو تمنّاده قیزیم
مطلع شعری دیوبدور منه بیر شخص جمیل
اوزی مدّاح حسیندور، آدی میرابی جلیل
اودی بو نوحه لرین یازماقنا اصل دلیل
عدلجونی گَتیروب شوره او آزاده، قیزیم
وداع حضرت علی اکبر عليه السلام
سبک : تک ضرب زنجیر زنی
مرحوم یحیوی
گل اوتور خیمه ده اکبر باشوا من دولانیم
فرش ایدوم تپراقا معجر باشوا من دولانیم
آناقربان گوزوه باخ آناون عَرضه سینه
بش دقیقه بو غر یبون گل اوغول خیمه سینه
پر وروم یانماقچون شمع رخون سایه سینه
مثل پروانه مکرر باشوا من دولانیم
مه جمالونده که خالی بوریوب موی سرون
خوش دگل ابر سیه اوستونه دوشسه قمرون
ساغ یوزوندن آیروم صول یوزوه طرره لرون
هاشمی خالوی گوستر باشوا من دولانیم
من سنی یولیورام دشت مناده ئوله سن
سالاسان لیلی بیچاره نی چولدن چوله سن
نه سن اسماعیل اولارسان گئده سن ساغ گله سن
نه ده لیلی اولور هاجر باشوامن دولانیم
ای منیم آرخام ائلیم شان و جلالیم کومگیم
گور نجه رعشیه دوشمش بدنیم جان و رگیم
دیزلریم عضولریم بیرده قان اولموش اورگیم
قوری یاپراق کیمی تترر باشوا من دولانیم
من بویوتدوم سنی اوز جانیملن قانیملن
هاجره فخر ایدورم سن کیمی قربانیملن
قوی ووروم کاکلوه شانه بو مژگانیملن
گوز یاشیلا سپوم عنبر باشوا من دولانیم
تار مویوندن آییر سینمه پیرایه وئریم
یا ئولندن صورا تحفه اونی زهرایه وئریم
یا نشانون آپاریم یثربه صغرایه وئریم
بینوادور سنی گوزلر یاشوا من دولانیم
باشدان عمامه گوتورنوروی تابنده ایله
سربرهنه گورونوب آی گونی شرمنده ایله
جلوه ی حسنله ئولموش اورگیم زنده ایله
دگمه میش باشوا خنجر باشوا من دولانیم
منه گوز آلتی باخوب آغلاما یاندیرما منی
دوشیوم قوی قدمون آلتدا بویانمیش سینه نی
گاهوارونده اوشاق وقتی یاتیرداندا سنی
گیجه لر ائتمیشم ازبر باشوا من دولانیم
خنجرو نیزه نه لازم سنه ای تازه جوان
حسدیندن ئولوراول ابروی مژگانه باخان
کیپریگون نیزه سنون مردم چشمون اوخ آتان
قاشلارون تیغ دو پیکر باشوا من دولانیم
من غریبم نه پناهیم وار امیدیم نه کسیم
سسیمه سس ویري کیملر علی غیر از نفسیم
سندن اوزگه بیلورم یوخدی منیم دادرسیم
نه آتام وار نه برادر باشوا من دولانیم
✍ گلچین نغمه های غم ✍
حضرت علی اصغر علیه السلام
: زبانحال حضرت رباب(س)درشام غریبان
استادهادی اردبیلی
سبک:شده آسمان خیمهٔ غم«میثم مطیعی»
اوغول سینم آچدی لالاگل
سالورغصه حالدان حالاگل
صودوم قاچدی کوسدون ننوندن
صوده گلدی سینم بالاگل
سینم یانوراودلارایچره یانان خیمه لرتک
صودیاندیرارمش آناسینه سین بیرشررتک
بالام هارداسان گل۲
دیلون تک قولون باغلی عطشان
هاراگئتدون آی خسته جیران
گونوزدن گوزوم یول گوزتلور
دئمورسن ننم قالدی ویلان
عشقون گلی آی گوزل داغلی سینمده سولماز
بللم کوسوبسن داریخدیم بئله کوسمگ اولماز
بالام هارداسان گل
ئوزون مقصده سن چاتوبسان
گوزوندن جهانی آتوبسان
دونن صبح اولونجاچالشدون
بوگجه نه راحت یاتوبسان
آخرگئدیشده آنوندان کوسوب غملی گئتدون
گهواروی بوش قویوب تپراقی بسترائتدون
بالام هارداسان گل
آناگوزدن اوغلون آتانماز
جهان قیمت اولساساتانماز
آناآیری دوشسه بالادان
ملرصبح اولونجاق یاتانماز
پروازخونین ائدوبسن سنه ال چاتانمور
سنسیزآنون ال ئورکده چالیخلوریاتانمور
بالام هارداسان گل
دونن که گجه ای گُل غم
سحرایلدون منله باهم
چالوردوم سینم اوسته لایلای
قالوب بوگجه خالی سینم
هئچ بیردئمورسن آنام بوگجه هارداقالدی
هئچ بیردئمورسن فراقیم اونی درده سالدی
بالام هارداسان گل
دوشوب یادیمه غملی چاقون
سولان صورتون گل دوداقون
گوزوم یاشی اللردعاده
دوتوم ایندی هاردان سراقون
آواره بیرباغبانم ایاتشنه سوسن
اوخ سالدی طوفان سو اوسته ایتوردوم سنی من
بالام هارداسان گل
بوگجه سن ای غم مارالی
قالوبسان آنوندان آرالی
سو اوستونده قانه بویاندون
یاتوبسان یارالی یارالی
بیریول دئمورسن بوچولده آدامسیزآنام وار
اللرئورکده باخوریوللاراگوزلرآغلار
بالام هارداسان گل
بوتزلیکده آی غنچه سولما
سوآزاداولوبدورپوزولما
صودوم وارنیه گلمیورسن
قولون باغلادیم کوسدون اولما
گلسون الون باغلیوب قلبوی داغلامارام
سینمده یارسون بالااللرون باغلامارام
بالام هارداسان گل
صفایوخ چمنده باهاردا
قناریم قالوب لاله زاردا
ئورگیم سینوب سندن اوغلوم
دئمورسن ننم قالدی هاردا
گوزدن پریشان ننوی علی جان آتوبسان
لایلای چالوب اوچ پراوخ گوزیوموبسان یاتوبسان
بالام هارداسان گل
منه سس وئراوغلوم سوزوم وار
نه صبریم نه دلده دوزوم وار
گوزون یاشی تک سالماگوزدن
گوزل گوزلرونده گوزوم وار
اشگیم آخاندامنه گوگده اولدوزلارآغلار
اولدوزلارآغلاریانان خیمه ده قیزلارآغلار
بالام هارداسان گل
ئوزون هاردا قالدون ای آغلار
اسر یل سنون تک نی آغلار
قوشوب ناله سین نیستانه
آنون سینه ده ال هی آغلار
هرسس که قالخوربوچولده اوغول غمفزادور
تک بویانان خیمه یوخ چول سراسرعزادور
بالام هارداسان گل
ویراردل فراقونده پرپر
چالورسان ئوزون سانکی شهپر
آچلسائورک اوستی باخسون
یانان خیمیه سینه بنذر
خیمه گونوزیاندی سوندی قالوب نصفی الان
سینمده سونموب گونوزدن قالوب نارسوزان
بالام هارداسان گل
گولوندن گولین اهلی دونمز
محبت گوزیلن گورنمز
سونرهریاناشعله دوشسه
ئورکدن دوتان شعله سونمز
بیراوتدی بو اوت توکوب قلب زاریمه پیکان
خیمه سرا تک یانوب داغلی قلب اولدی ویران
بالام هارداسان گل
حضرت رقیه سلام الله علیها
مرحوم عبد الرّحیم شباهنگ متخلّص به هندی
بو خرابه شامیده عمّه جان گجه گوندوز اوخشارام آغلارام
نه قدر واریمدی بو جاندا جان گجه گوندوز اوخشارام آغلارام
منی آیریلوق غمی نی کیمی گتیروبدی درده خرابه ده
هر او کس اولا منه هم نفس یانار آه سرده خرابه ده
نجه من بو سرّه که فاش اولور چکوم عمّه پرده خرابه ده
اودی که عیان و گهی نهان گجه گوندوز اوخشارام آغلارام
گوروسن که تیر بلا منیم نجه سیندیروب پر و بالیمی
ندور احتیاجی بیان ایدوم غم و درد و رنج و ملالیمی
اوزون اهل حال سن عمّه جان سنه منده صورت حالیمی
ایدرم سرشکیمیلن بیان گجه گوندوز اوخشارام آغلارام
من او بلبلم که سولار گلی اولور عمّه جان چمن آیریسی
منی تندباد فراق ایدوب نجه سرو گل بدن آیریسی
بیله رسمیدور که ویرینجه جان گرک آغلاسون وطن آیریسی
اودی وجهی عمّه ی مهربان گجه گوندوز اوخشارام آغلارام
من او عاشقم که زمانه نین هامی ناز نعمتین آتموشام
هم آتام عموم همی قارداشیم اُلوب ایمدی یاسینه باتموشام
نچه وقتیدور گه من آج سوسوز گجه لر خرابه ده یاتموشام
منه چون خرابه اولوب مکان گجه گوندوز اوخشارام آغلارام
هانی بیر یتیمه منیم کیمین اولا نیلی سیلی ایله یوزی
یوزینه باخاندا آتاسینون دوشه قان دوتان گوزینه گوزی
قولی باغلی، غیر شماتتی، آتا مرگی، جان غمی، ایل سوزی
ایلیوبدی باغریمی غصّه قان گجه گوندوز اوخشارام آغلارام
منی چوخ بو پایه دن اینجیدن نه غل و دوشاخه دی نه رسن
منه چوخ گراندی بو بیر جفا که شماتت ایلوری هر گلن
گر اُلوب بابام گیدوب عزّتیم گینه شاهزادیم عمّه من
دوزه بولمرم اودی بیر زمان گجه گوندوز اوخشارام آغلارام
سنه شرح درد فراقیدن نه دیوم که بیر دگی محنتیم
بو اسیرلیق بو یتیم لیق بو خرابه کنجی بو غربتیم
باش آچوخ گونش قوری یر یریم بو جفای شمر بو ذلّتیم
نه باش اوسته سقف نه سایه بان گجه گوندوز اوخشارام آغلارام
نه روادی کینه ی شمریدن سارالوب خران گلی تک اسم
نه روادی الدن آتام گیده گوزیمی یولوندان اونون کسم
گورورم که یوخ داخی بیر کسیم بو دیار شامیده بی کسم
اولی گریه مونس بی کسان گجه گوندوز اوخشارام آغلارام
دوزرم بو جسم ضعیفیله هامی درد و محنت و رنجه من
قوری یرده فرش و چراغسیز چکرم همیشه شکنجه من
بو اوشاقلیقیمدا دایانموشام گینه درد و محنت و رنجه من
دایانانمارام داخی عمّه جان گجه گوندوز اوخشارام آغلارام
یوخودا گوروب بابامی دیدیم اونا عرض حالیمی بیر به بیر
که بابا گوزوندن ایراق سنون بیزه ویردیلر قوری یرده یر
باشیما چکوب الینی دیدی دی سکینه دردیوی بیر به بیر
دیدیم ای بابا بودی بیر نشان گجه گوندوز اوخشارام آغلارام
منه سویلدی که سکینه جان نجه اولدی دردیله سازشون
دیدیم اولدی قوّت دل منه او جِدا باشیندا نوازشون
دیدی یوخ خرابه ده چون باشیم گجه صبحه تک ندی بس ایشون
دیدیم هر زمان ایدرم فغان گجه گوندوز اوخشارام آغلارام
دیدی کیم چکوب بالا زحمتون سنه کیم مواظبت ایلدی
دیدیم اول بلاکش اولان بیبیم منه چوخ ملاطفت ایلدی
دیدی همزبان سنه کیم اولوب بالا چوخ ملایمت ایلدی
دیدیم اولدی غم منه همزبان گجه گوندوز اوخشارام آغلارام
داخی یاتمیون که بابام گلوب ایلیوب بو یرده مکان دورون
بو قرانلوق ایوده که لایقی هامی شمع آهوزی یاندورون
او چراغیلن من بی کسی بو خرابه ایچره دولاندورون
بابام اولماسا منه میهمان گجه گوندوز اوخشارام آغلارام
بو طریق عشقیده «هندیا» ایله سیر قلب سلیمیلن
تانی بیر حسینی بو دوره ده نه ایشون خلیل و کلیم لَن
اگر ایسته سن که شفاعتون اولا سر ذبح عظیمیلن
دی سکینه سویلدی عمّه جان گجه گوندوز اوخشارام آغلارام
راه شام
مرحوم انور اردبیلی
غروب اولاندا گیدر قلبیدن قراری یتیمون
قرا گیینده هوا قالماز اختیاری یتیمون
شفق رنگ طلایی گییر لباس شبانه
توکر سرشگی ایکی چشم اشگباری یتیمون
هزار هزاریه نسگل اولور سرود عزاسی
هزار درده دونر دردی از هزاری یتیمون
ائدر یول اوستونی دیواریلر کنارینی ماوا
گر اولماسا ایوی آرتیق اولار فشاری یتیمون
ساتار گلیب گیدنه در اشگینی آلان اولماز
عیاریدن کم اولار در پر عیاری یتیمون
گوتورور عکسینی عکاس عالم ملکوت
پوزار ملکلریده غملی یادگاری یتیمون
یوخوسی گلسه قولون بالش ایلیب گیدر هوشه
دوشر نظردن ایکی نرگس خماری یتیمون
دارار قرا تللینی لای لای دییر قره یللر
یئل اسدیقیجا گیدر طره دن غباری یتیمون
اوجا سسی ائشیدر دیسگینر دورار یوخوسوندان
ئورکده وحشتی آرتار بلا دچاری یتیمون
گینه ده اوغلان اوشاقی اولا نه غصه سی واردور
دوزر بلایه اولار غمله سازگاری یتیمون
آتاسی ئولسه اوغولدان قیزا موثر اولار چوخ
آنا باجینی کباب ایلر آه و زاری یتیمون
دوشر نه حاله بو قیز ساربان قویوب گیده چولده
اوزه الیندن الین بوش قالا کناری یتیمون
گوزون آچوب یوخودان پهن دشته ائتدی نظاره
گوروبدی کوچ ائلیوب مقصده قطاری یتیمون
اگر چه آج سوسوزیدی غذاده چیخدی یادیندان
مدار غصه ده تنگه دوشوب مداری یتیمون
صاقا صولا نچه یول عمه عمه سسلدی قاچدی
دیدی هایانداسان ای غم گونونده یاری یتیمون
سسینه اولمادی سس ئوز سسین ایشیتدی او چولده
ئوزون یوروب آزالیب قدرت فراریا یتیمون
قدم آتیب بو قیزون نیش خار ایاقینی ئوپدی
اورک قانی ایاقیندان اولوبدی جاری یتیمون
کسیلدی چاره او یورقون بالا یول اوسته اوتوردی
دوشوب خیالینه ئوز شهری ئوز دیاری یتیمون
گویول قوشی پر آچوب اکبرین اتاقینه گیتدی
گوروبدی اوردا دگول قاره گوز نگاری یتیمون
کمال یاأسیله یوز دوندریبدی راه دمشقه
دیدی گیدیب بو یولی شامه غمگساری یتیمون
هایانداسان علی ایستکلین اولدی چوللر اسیری
نه قورخولی یئره گل گور دوشوب گذاری یتیمون
آتام بابام کیمی سنده علی یتیمه نواز اول
محبته واریدی سندن انتظاری یتیمون
بیبی لریمه گلایه ایله منیم عوضیمدن
آزالدی تئز نه سببدن گور اعتباری یتیمون
اوزوم یوخودان اویاندیم نه چاره بختیم اویانمور
اویانسادا دی گوروم بختینون نگاری یتیمون
اثر ایدیبدی سوزی پهلو شکسته فاطمیه
پوزوبدی حالتینی حال انکساری یتیمون
گلوب بو خیردا قیزون باشینی دیز اوستونه آلدی
اوپوبدی لبلرینی مادر کباری یتیمون
جمالینه توکولن تللرین اویان بویان ایتدی
مجسم اولدی نظرده صولان عذاری یتیمون
دچار ثانی اولوبسان بویوک ننه ن کیمی سنده
اونا چتین یتیشه تیره روزگاری یتیمون
گوزوندن اشگیوی سیلم بو چولده همدمین اولام
دوزنمرم قالا تنها سینا وقاری یتیمون
بالا داریخما شامه گیدنلر گلر سراغیوه الان
که چوخدی غافله ده یار هوشیاری یتیمون
بو خردا قیز او خانوم عورتین ائشیتدی کلامین
دیدی گمان ایدیرم آرتدی افتخاری یتیمون
بی بیم کیمی بوخانیم دم بدم اوپور دوداقیمدان
ایکی گوزوندن ایدیر اشگین نثاری یتیمون
بهشت عطری گلور حوریدی گلوبدی بودشته
ملکدی یا کی گلوب اولدی یار و کاری یتیمون
اگر بو حور و ملکدور نیه قرا گییونوب
عجیب غصه لیدور مونس فکاری یتیمون
غریب آتامون آدین ازبر ایلیوبدی دیلینده
چوخ آشنادی بونا باب تاجداری یتیمون
گوزلدی گوزلری عینا بی بیمه بنذری واردور
باخاندا گوزلرینه قالمور اختیاری یتیمون
اولما مدینه اهلیدی اولما دوشوب گذاری بوچولده
عجب کمک یتیروب آفریدگاری یتیمون
تانیمورام ولی بو دیندیریر منی ئوز آدیملا
نه غصه سی وار اولا بیله غصه خواری یتیمون
اورکلنوب دیدی بیردن خانیم گلورسن هایاندان
فدا بو گوزلریوه قلب پر شراری یتیمون
سنون بو یاخشیلیقون لازم هدیه دی نیلوم
نه واردی قولباقی نه واردی گوشواری یتیمون
بیزیم قبیله میز اهلی سخادی ایش بیله دوشدی
اولان بو گوز یاشیدور یوخدی آیری واری یتیمون
من آغلورام بابامین باشینی ووروبلا جدایه
آتاسی ئولسه اولار اوخشاما شعاری یتیمون
سنون ئولوبدی کیمون آهون اوستن آه چکیرسن
باخور سنه چوخالور درد بیشماری یتیمون
نفسون اوتلیدی قدین خمیده ساچلارین آغدی
قرا گونون قره ائتمه به حق تاری یتیمون
جواب وئردی منه فاطمه دییللر عزیزیم
شریک محنتیوم جداً آری آری یتیمون
بالام حسینه جگر گوشه سن بویوک ننووم من
منه موثر اولار بزم سوگواری یتیمون
